Бүртгүүлэх | Нууц үгээ мартсан

Та бүхэнд захидал хүрэх өдрийн мэнд хүргье. Намайг С гэдэг. 21 настай.  Нэгэн их сургуулийн оюутан. Надад нэг асуух зүйл гараад танай сайт руу захидал бичиж байна. Би найз залуутайгаа үерхээд жил гаран болж байна. Байнга биш ч хэн хэн нь ажлаа зохицуулаад хааяа нэг уулздаг юм. Үерхэж байгаа гэхэд үгүй ч юм шиг... Яг үерхээгүй юм уу гэхээр бас л үгүй... Хэн хэндээ нэг их татагдаад л байнга уулзъя учиръя гээд байдаггүй юм л даа. Долоо хоногтоо 1, 2 удаа л уулздаг. Бусад үед нь хэн хэн нь ажил, хичээл сургууль гээд бараг ярьдаг ч үгүй. Гэтэл би саяхан жирэмсэн болсоноо мэдлээ. Одоо түүнд хэлэх үгүйгээ, бас хүүхдээ гаргах үгүйгээ шийдэж чадахгүй байна. Би ч түүнд анхнаасаа л нэг их хайртай байгаагүй. Харин одоо бол яахав дассан сэтгэл л байна. Тэр ч надтай адил юм шиг санагддаг. Бүр заримдаа ажлынхаа хүүхний тухай хүртэл яриад над руу тэгээд ингээд гээд яриад байдаг хүн. Би түүнд хэлэх хэрэг байна уу гэж бодох юм. Тэгээд хэллээ ч би хүүхдээ тээгээд ганцаараа хоцорвол яах вэ, бас үгүй гэхэд хэн хэндээ нэг их сэтгэл гаргадаггүй хоёр хүн суувал яах бол гээд л их олон зүйл бодоод яах учраа олдоггүй ээ. Надад туслаач...



Сайн байна уу?
Бидэнд хандаж энэ захидалыг илгээсэнд баярлалаа. Таны байж байдал үнэхээр бодууштай эргэлзээтэй зүйлсээр дүүрэн байгаа нь дамжиггүй. Нас залуу байхдаа таных шиг байдалд байж байгаад хүслээгүй гэрлэлтийн эх үүсвэрийг бий болгосон олон гэр бүл хамтдаа амьдрах чадваргүй удалгүй мөхөж эхэлдэг гашуун туршлагууд ч хаа сайгүй байгаа гэдгийг та ухамсарлаж байгаа мэт санагдлаа.
Мэдээж анхнаасаа ямар нэгэн юм нь таалагдаад бие биентэйгээ байхад тааламжтай гоё байдаг болоод уулзаж эхэлсэн байх гэж найдаж байна. Найз залуу чинь ч ялгаагүй ямар нэгэн юманд чинь татагддаг тал бий байх. Ямартаа ч энэ уулзалтууд зөвхөн секс хийхийн тулд байсан уу, эсвэл бие биенийгээ хүндэлж дэмждэг харилцаа байсан уу гэдгийг таны зүрх сэтгэл сайн ялгаж салгаж байгаа байх.
Миний өгөх хамгийн эхний зөвлөгөө бол найз залуутайгаа ярилц, нууж хаахгүйгээр яг юу бодож санаа зовж байгаагаа хэл. Мэдээж залуу хүн болсон хойно бас л айж сандарч янз янзын аргаар хүлээж авах нь ойлгомжтой. Яаж хандахаа мэдэхгүй халгаж зугтдаг залуучууд ч байдаг. Үнэндээ танд хайргүйдээ биш, өөрөө яг яаж тантай харилцаж тайтгаруулахаа мэдэхгүй хүн ч байж болно шүү дээ. Түүнээс үзвэл та найз залуугаа яг хандсан ч өөртөө хүнд цохилт шаналгаа үүсгэхгүйгээр өөдрөг сэтгэлгээгээр арай том гэгээлэг ирээдүйг өөртөө ч найз залуудаа ч, нялх үрдээ ч гэсэн өгөх хэрэгтэй гэдгийг барьж ярилцаарай. Саяхан надтай нэг залуу холбогдож найз охиноо жирэмсэн болсон тул яаж амьдралаа чиглүүлэхээ мэдэхгүй айж яваа тухайгаа дэлгэн ярилцаж байсан. Би түүнийг найз бүсгүйтэйгээ ярилцахдаа юунаас айгаад байгаагаа чин сэтгэлээсаа гаргаж ярилцсан. Харин хэдхэн долоо хоногийн дараа тэрээр бахархалтай нь аргагүй сайхан гэр бүлтэй сайхан амьдарна гэдэг амлалтыг гаргаж байсныг нь санаж байна. Энэ залуу надтай ярилцаад хэдхэн долоо хоногийн дараа энэ явдалаар дамжуулж амьдралаа өөд нь татах ёстой хариуцлагатай гэдгээ ухамсарлаж найз бүсгүйтэйгээ урьд нь хэнд ч хуваалцаж чаддаггүй байсан айдсаа хуваалцаж илэрхийлж сурсан юм.

Тиймээс таны нөхцөлд ч гэсэн, томоохон шийдвэр гаргах үе ирсэн байна гэдэг нь ойлгомжтой. Гэр бүл босгох уу, эсвэл ганц биеэр амьдралаа үргэлжлүүлэх үү гэдэг шийдвэрийг та гаргах цаг нь иржээ. Энэ шийдвэрийг та ганцаараа биш, найз залуугийнхаа хамтаар гаргана. Зүгээр нэг хөнгөн хийсвэр оролдоод үзэхээс гэсэн утгатай үхмэл шийдвэр биш, насан туршдаа ямар ч хэцүү үед бие биендээ түшиг болж чадах тийм хүн байж чадах эсэх шийдвэрээ та хоёрын аль аль нь гаргах хэрэгтэй болжээ.
Үр хүүхэдтэй болоод ирэхээр аз жаргалаар дүүрэн ч, залуу хосууд өөрсдөө сэтгэлийн бэлтгэлгүйгээс, бие биенийхээ өмнө хариуцлагаа бүрэн ухамсарлаагүйгээс санамсаргүй болоод огт шаардлагагүй сэтгэлийн гүн шархуудыг бий болгодог гэдгийг бүү мартаарай.
•    Та яг ямар гэр бүлтэй ямар төрлийн амьдралаар амьдрахыг хүсдэгээ мэдэх  үү?
•    Таны үр хүүхэд ямар орчинд өсөн бойжоосой гэж та боддог вэ?
•    Та найз залуугийнхаа сайн сайхан ирээдүйд нь дэмжлэг үзүүлэх хань болоход бэлэн үү?
•    Та өөртөө болон өөрийнхөө амьдралд хайртай юу?
•    Танд ямар ч бэрхшээл тохиолдсон өөрийгөө, хань ижлээ, үр хүүхдийнхөө өмнө хариуцлага хүлээхийг хүсэж байна уу?
•    Та найз залуугаа ойлгох, түүний ажил мэргэжил, сонирхолд өсөн хөгжих боломж өгч чадах уу?
•    Таны  найз залууу таныг ойлгох, таны ажил мэргэжил сонирхолыг  дэмжиж, өсөн хөгжих боломж өгч чадах уу?
Дээрх асуултуудад нухацтай хариулаад үзсэн үедээ та хаашаа амьдралаа залах тухай зүг чигээ сонгох шийдвэрээ эргэлзэхгүй гаргах боломж олдоно гэдэгт найдаж байна.
Танд амжилт хүсье, дээрх зөвлөгөө танд хэрэг болно гэдэгт найдаж байна. Хэрэв та өөрийнхөө амьдралын энэ бэрхшээлтэй асуудлыг шийдэж, боломж нөөцөө таньж сурахыг хүсвэл миний саяхны бичсэн Бэрхшээл ба Боломж номыг олж авч уншаарай. Энэ ном УБ-ын бүх номын сангуудаар тавигдсан байгаа, харин та гадаадад амьдардаг бол EBAY дээрээс худалдан авч болно. Энэ бүхнийг давж гарахад сэтгэлийн тэнхээ эрч хүч, амьдралдаа амжилт авчрах дасгалжуулалт хийхыг хүсвэл monicabs89@yahoo.com хаягаар  надтай холбогдож болно. Бид тантай гэрээт дасгалжуулалт хийж ажиллаж болно.
Уншигч танаа, хэрэв таны гэр бүлд эсвэл хувийн амьдралд ямарваа нэгэн асуудал сэтгэл зовнисон зүйл байвал энэ захидалын нэгэн адил үнэгүй зөвлөгөө авахыг хүсвэл freezone@yahoo.com хаягаар бидэнтэй холбогдож болно.

Монгол Амьдралын Дасгалжуулагч
Бэрхшээл ба Боломж номын зохиолч
Б.Мөнгөнтуяа