Бүртгүүлэх | Нууц үгээ мартсан

Сайн байна уу? Та бүхэнд энэ өдрийн мэндийг хүргье. Намайг Н гэдэг. Би нөхөртэйгөө гэрлээд 3 жил болж байна. Манай хүн надаас 8 ах урьд нь гэр бүлтэй байсан хүн л дээ. 2 хүүхэдтэй. 2 хүүхэд маань бидэнтэй цуг амьдардаг юм. Харин бидний дундаас хүүхэд гараагүй. Одоохондоо дутагдах гачигдах зүйлгүй сайхан л амьдарч байна. Гэхдээ манай хүн хуучин эхнэртэйгээ байнга холбоотой байдаг нь миний санааг үргэлж зовоох юм. Энгийн харьцаатай гэж хэлэхэд жаахан хэцүү л дээ. Үргэлж чи минь гээд л хааяа бүр хайртай гээд мессеж бичилцчихсэн байхыг нь уншиж байсан болохоор тэр нь миний санааг зовоодог байсан. Харин сүүлийн үед миний сэтгэл нэг л хөрөөд байх шиг байна. Нэг л тогтворгүй болоод гомдол төрж, гэртээ орох ч хүсэлгүй байдаг боллоо. Дээр нь сексийн тал дээр ч нэг л таарамж муутай байгаа. Манай хүн нэг л хойрго болчихсон юм шиг санагдах юм. Ямар ч санаачлагагүй нэгэн хэвийн. Бас дээр нь долоо хоногтоо ганц, 2 удаа л секс хийж байгаа. Магадгүй тэр өөр хүнтэй юм болов уу. Энэ бүхнээс нь болоод би түүнээс салдаг ч юм уу гэж бодох юм. Бага хүүхэд маань /манай нөхрийн/ 10 настай тэгсэн хирнээ бид 2той унтдаг. Би ойрд яг л зүгээр нэг гэр бүл болж тоглоод байгаа юм шиг сэтгэгдэл төрөөд байдаг болсон. Дээр нь цалингаа аваад хуучин эхнэртээ мөнгө өгнө. Тэгсэн хирнээ мөнгө хүрэхгүй байна гээд л байнга хэрүүл өднө. Уг нь манайх тэгтлээ дутагдаж гачигдаад байдаг айл биш. Би цалингаа аваад л гэр орондоо л зарцуулдаг. Өөртөө ч наасан юм байхгүй. Гэтэл үргэлж мөнгөний асуудал ярьж, болж байгаа зүйлийг ч болохгүй байна гээд л уурлаж уцаарлана. Тэр хүнд тэгтлээ таалагдахгүй, болохгүй санагдаад хэцүү байвал яв гэхээр явахгүй. Сүүдээ би тэр хүнийг яах учраа олохгүй байна. Би одоо энэ амьдарлаас үнэхээр залхаж салмаар санагдах юм. Энэ бүхнийг яаж зохицуулбал дээр бол надад хэлж туслаач. Би 3хан жилийн дараа 30 хүрэх нь гэтэд би залуу насаа, хайран цаг хугацааг дэмий үрээд байгаа юм болов уу гэх бодол ч төрөх юм. Зүгээр л өөрийн үеийн урьд нь амьдрал зохиож байгаагүй хүнтэй танилцаж гэрлэсэн бол миний амьдрал өөр байх байсан юм болов уу ч гэж бодох боллоо. Надад туслаач.











Сайн байна уу? Захидал бичсэнд тань баярлалаа. Мөн энэ захидалын хариуг бичихэд удсандаа хүлцэл өчье. Би таны бичсэн захидалаас доорх хэд хэдэн зүйлийг шийдэхийг хүсэж байгаа юм болов уу гэж ойлголоо.
•    Та одоо 30 настай, залуухан. Сайхан гэр бүлтэй амьдрахыг хүсдэг боловч санаагаар болохгүй байгаа. Та ямар нэгэн өөрчлөлт хийхийг хүсэж байгаа.
•    Нөхөр тань хуучин эхнэртэйгээ харилцаа холбоотой. Энэ нь таны сэтгэлийг зовоодог. Эхнэртээ мөнгө өгдөг нь танд таалагддаггүй. Илүү дотно харилцаатай болов уу гэж та таамагладаг.
•    10 настай хүүхэд нь нөхөр та хоёртой унтдаг. Тэр нь танд таалагддаггүй.
•    Нөхөр тань сексийн харилцаандаа хайхрамжгүй, цөөрсөн. Гэтэл та сексийн дотно харилцаатай гэр бүл хүсдэг.

Ямар ч гэр бүлийн дотор эдгээр харилцаа маш их элбэг. Ер нь шулуухан хэлэхэд асуудалгүй гэр бүл гэж хаа ч үгүй. Ялангуяа урьд нь гэрлэж байгаад шинээр гэр бүл зохиож байгаа ямар ч хүний хувьд харилцаандаа хүссэн ч хүсээгүй ч нэгэн төрлийн өөр цэг үүссэн байдгийг үгүйсгэх аргагүй юм. Танай нөхрийн хувьд энэ бүхнийг бүгдийг нь зэрэг зохицуулахад амаргүй гэдгийг та бас гадарлаж байгаа байх. Магадгүй та хоёр гэр бүл болохоосоо өмнө энэ талаар бага сага ярилцаж тохирсон ч байгаа байх. Ярилцаж амжаагүй, хойш тавьсан, эсвэл ярихаас зайлсхийдэг бол энэ асуудал маань үнэндээ та хоёрын хооронд ангал үүсгэж байгаа гэсэн үг. Таны дурьдсан дээрх шинж тэмдэгүүд ч гэсэн санамсаргүй үүсээгүй. Магадгүй та хоёр энэ талаар нээлттэй ярилцаж чадаагүй зүйлс байгаа учраас тэр бүхэн нягтаршиж бие биендээ дотны янаглал үүсгэж чадахгүй, үл итгэх, зайлсхийх хандлагыг өгдөг ч байж болох юм. Юутай ч өнөөдөр та бидэнд хандсаны гол зорилго бол энэ бүхнийг нэг тийш болгож зохицуулах хүсэлтэй гэдэгтээ юм болов уу гэж би ойлголоо.

Дээр дурьдсан зүйлс бүгд таны хүсэхгүй байгаа орчин нөхцөл, бас цаашлуулвал таны хүсээд байгаа атлаа авч чадахгүй байгаа зүйлс гэдгийг та хүлээн зөвшөөрч байгаа байх. Эдгээр зүйлс эхлээд та өөрөө юунд төвлөрч юунд шаналж байна, тэр хэмжээгээрээ өсөн томорч байгаа. Энэ захидалаар дүүрэн таны хүсэхгүй байгаа зүйлс бичигдсэн атлаа, хүсэж байгаа зүйлс ховорхон дурьдагдсан байна. Тиймээс би таныг доорх хэдэн дасгалыг ажиллаад үзэхийг зөвлөж байна.
1.    Та яг юу хүсэж байна? Анх нөхөртэйгөө гэрлэхдээ хүсэж байсан, одоо ч хүсэж байгаа зүйлсээ бодоод жагсааж бичнэ үү. Дор хаяж 10 зүйлс жагсааж бичээрэй. Энэн дотор магадгүй гэр бүл гэж таны ойлголтоор, мөрөөдлөөр юу байвал илүү сайхан орчин, тав тухтай нөхцөлийг бүрдүүлж чадах вэ гэсэн сэтгэлийг тань шингээж болох юм. Таны энэ жагсаалт бүгд эерэг утгатай, эерэг сэтгэгдэлүүд байх ёстой гэдгийг сайн санаарай. Хэн нэгнийг буруутгасан, эсвэл бухимдсан, гоморхсон сэтгэгдэлийг үүнд бүү гаргаарай. Зөвхөн таны чин сэтгэлийн хүсэлт юу вэ?
2.    Нөхөр тань таны дээр бичсэн энэ хүсэлтүүдийг, мөрөөдлийг мэдэх үү? Та хэлж байсан уу? Хэлэх гэж оролдож байсан уу? Ямар үед нөхөр таны энэ хүсэл тэмүүллийг хүлээн авч, ойлгож ярилцаж чаддаг вэ? Тэр үеээ сонгоод нөхөртэйгөө энэ ариун хүслээ илэрхийлнэ үү. Хүслээ илэрхийлэхдээ нөхрөө буруушаасан бус, ойлгодог, хамтран амьдралаа бүтээж байгаа гэдгээ ойлгуулаарай. Магадгүй та ингэж харилцахдаа нөхрийнхөө чаддаг зүйлс, давуу чанаруудыг дурьдаж хатуу зөөлнийг хамтад нь илэрхийлвэл дээр болов уу.
3.    Нөхөртөө итгэ. Нөхрөө таны төлөө, таныг ойлгодог, таны сайн сайханд сэтгэлээ гаргадаг тэр хайртай хүн мөн гэдгийг байнга хүлээн зөвшөөрч хүлээцтэй, итгэлтэй хандлага гаргах нь чухал. Хэрэв та нөхөртөө итгэж чадахгүй, хардаж сэжиглэх харилцаа үргэлжилвэл, таны анх дурьдаж байсан шиг танай гэр бүл салалтаар л дуусах болно. Та үүнийг хүсэж байна уу? Өөрөөсөө асуугаад үз. Хэрэв үүнийг хүсээгүй бол, нөхрөө цаашаагаа бүү түлх. Таны нөхөртөө итгэсэн итгэл та хоёрыг буцаан ойртуулж чадна.
4.    Гэр бүлээ сайн сайхан, хүссэн мөрөөдлийнхөө харилцаанд байлгахын тулд таны зүгээс хийж чадах, нөхрийнхөө зүгээс хүсэж буй зүйлсээ бодоод үз. Түүнийгээ нөхөртөө илэрхийлж харилцаж чаддаг байгаарай. Эдгээрийн дотор мэдээж хэрхэн 10 настай хүүхдийг бие даасан орондоо унтдаг болгох тухай, хэрхэн салсан эхнэртэйгээ харилцаагаа зохицуулах тухай бага сага ярилцлагууд хамрагдах нь лавтай. Амархан биш боловч хэцүү гэж хэн ч хэлээгүй ийм л хэсэг ажлыг та зохицуулах шаардлагатай болоод байх шиг байна. Та үнэхээр сайхан гэр бүлтэй ирээдүйгээ авч явахыг хүсвэл тодорхой өөрчлөлтүүдийг, түүндээ тохирох зарим нэгэн урлаг, ухааныг, зүрх сэтгэлийг, магадгүй тэвчээрийг гаргаж сурах нь зайлшгүй байх даа.
Дээрх хариултаас уялдуулаад таныг гэрийнхээ даалгаварыг хийнэ гэдэгт итгэлтэй байна.
Танд аз жаргалтай дотны харилцаатай гэр бүлийг бэлэглэе

Хүндэтгэсэн
Амьдралын Дасгалжуулагч Б. Мөнгөнтуяа